梳乎過多兩星期就返天后覆診, 主要比醫生跟進返個餐單
最近返工無上facebook, 轉o左上網睇食材資料, 同埋睇返以前日本叔叔幫梳乎設計o既餐單
其實食Homemade 只要多元化, 同埋食多o的有營養o既食物, 營養方面都應該唔成問題o既
不經不覺, 乎B 間歇食homemade已經有4個月, 其實頭一個月同最近7月我地都係每晚煮homemade, 相對之前一星期3餐, 其實每晚一餐效果都唔錯
梳乎淚水少o左, 便便少o左, 依家好似以前食日本糧咁, 一日兩次正常健康便便, 同埋, 竟然係無o左食便便的習慣, 我估可能依家佢吸收好o左, 所以唔會食便便喇~~
不 過o黎緊覆診, 我都有幾個問題要問醫生, 例如, 紅肉同白肉o既比例啦, 生果可唔可以食啦, 我見好多狗糧都有落紅梅, 藍梅, 其實唔知佢食唔食得, 因為我一向都怕果糖問題, 唔比梳乎食生果, 而且怕對佢牙仔唔好, 仲有就係, 其實梳乎可唔可以食菇類, 以前日本叔叔係有落菇菇o架, 我又想知梳乎可唔可以食綠藻, 同埋我諗o左幾種油唔知梳乎可唔可以食, 仲有好多好多問題, 希望到時醫生唔好覺得我煩啦
呢幾樣食材, 係以前日本叔叔有用o既, 其實我諗諗o下, 梳乎依家每日只係食一餐乾糧, 不如我訂返日本糧比佢啦~~ 軸射問題, 我估日本叔叔唔會用有問題o既材料o掛....
北海道o既利尻昆布係昆布之中質素最好o既, 昆布含有Fucoidan, 對於抗癌, 增強抵抗力, 提高肝臟功能好有用, 而且海藻類仲對皮膚有幫助, 對胛臟腺機能亦很有功效, 對於容易敏感o既人o黎講, 昆布仲有舒緩敏感o既功能
白 芝麻, 本身白芝麻狗狗係消化唔到, 所以一定要買白芝麻粉, 磨碎晒佢地先吸收到o架, 白芝麻粉入面有一種叫セサミノールo既物質, 係可以抗酸化, 有防止衰老, 抗癌降高血脂, 以防膽固醇過高等功用, 我就偶爾會加少少落homemade 到比梳乎擋調味, 佢食得超級開心o架!!
之 後仲有日本長芋, 佢好滑潺潺o既物質其實係含有glucosamine 同chondroitin sulfate, 呢兩樣物質都係對強化關節同防止老化有效的物質, 所以唔只係鯊魚軟骨先有呢種營養, 如果食素o既人士, 希望吸收glucosamine, 都可以食多d長芋同埋秋葵, 秋葵一樣有好滑潺潺o既黏液, 對關節一樣有幫助, 秋葵雖然偏寒, 不過佢有強腎功效, 我地之前都有keep住比梳乎食秋葵
最近我開始睇o下梳乎Bo既膳食, 暫時效果唔錯, 最近摸梳乎B腳仔無咁鬆喇, 我同Karson都好開心, 記得好耐之前, 梳乎B腳仔可以由grade 1變返grade 0, 好希望奇蹟會再出現, 今次我唔貪心, 我只想乎B腳仔可以由grade 2變返grade 1, 雖然好多醫生都話乎B要做手術, 不過我真係好希望食材可以再一次幫乎B, 或者令佢唔好惡化, 咁樣梳乎就唔使做手術, 依家我只想梳乎開心同健康, 我地花少少時間同心機唔成問題
今日仲買o左好多蔬菜煲湯比梳乎B飲, 有紅菜頭, 蕃茄, 薯仔同紅蘿蔔, 因為乎B飲, 我怕太肥所以唔會落肉, 未加鹽之前就裝起比乎B飲o既分量, 之後加o左鹽就自己飲埋佢~~ 好健康呀!!!!
之後一晚, 仲整o左紅菜頭比梳乎食, 整o既時候成手染晒色, Karson 話以後唔整wor, 不過其實好有營養o架, 我話最多以後用o黎煲湯比乎乎飲囉~~ 而且梳乎仲好鍾意食添!
沒有留言:
發佈留言